「2003號，你冇名？」陳子漢問。

「囚禁太耐，我都唔記得咗。」

陳子漢將我帶返到自己的營地，那裡有營火和簡單搭建的小草屋，是他們居住過的痕跡。

「睇嚟我啲同伴出咗打獵。」陳子漢拿起一條繩子，綁在我一隻腳上：「你企定定啊。」

「做咩啊你……」我心裡有想過逃跑。

結果，原來他要倒吊著我。

「俘虜就應該有俘虜嘅樣子。」陳子漢滿足地點頭。

「啊……好彩太陽唔係好曬。」我心中慶幸，至少不用成為肉乾。

陳子漢從小草屋裡，拿出一塊像鹿皮的東西：「今日佢哋去呢個位搜索……正常應該好早返。」看來，這塊鹿皮上刻畫著地圖。

「大哥，我有少少腦充血……」我頭部變得赤紅。

「咁洗唔洗幫你放下血。」陳子漢不想理會我。

「你咁樣吊住我冇咩用……」

「有，後備食糧。」

「我咁瘦邊好食……」

「做肉食動物誘餌就啱啱好。」

結果，到晚上他的同伴都還未回來，坐在營火前的他都不禁憂心起來。

「你識唔識打架？」陳子漢突然問。

「識…」我虛弱得很。

一秒後，我就被他放了落地。

「嗄…」口很乾。

「同我一齊去搵下，我朋友好耐都未返。」

「再見……」我狼狽地站起，想要逃跑。

「你即管走，宜度係森林中央，好彩嘅話只係迷路，唔好彩就遇上危險，特別係你宜啲未行過嘅人。」陳子漢卻不加以阻攔。

「咩意思……」

「都話咗，出面有好多危險，有一班同樣流落喺荒島，但有武裝嘅人狩獵緊我哋。」陳子漢簡略地交代現況。

「你見過？」我問。

「佢哋每人一把步槍、幾個彈匣、防彈衣、軍刀、頭盔，完全唔似係原住民，就咁睇似係想虐殺我哋。」陳子漢心有餘悸。

「咁我宜家要…」

「你負責拎火把就足夠。」

於是乎，我半推半就地加入了陳子漢的行列，幫他尋回失散的同伴。那張鹿皮地圖，他一併交到我手上，讓我在前方開路，自己則在後面跟著。

要到他所說之地，也不過十五分鐘的路程。

我停下來：「就係宜到？」這裡，是個小山洞。

「係，佢哋入咗去探險，原本諗住想搵山洞住，所以先叫佢哋睇下情況先。」陳子漢說。

「佢哋有幾多個人？」

「兩個。」(續)

墨說

簡介：喜歡貓和寫作的平凡少年
Facebook：墨說