連載小說《Live》#07 – 墨說

「走！！」我倆不約而同地逃跑。我們不斷狂奔，往洞口外離開，好奇地稍為回頭一望，才發現追著我們的是隻斑紋獵豹。

出到洞口，牠才放棄追捕我們，得以逃過一劫。

「呢個荒島都幾熱鬧……」我喘氣。

「佢哋死鬼哂，我又冇哂同伴。」陳子漢這句，顯然對我說。

「……」

「喂，2004號，要唔要加入我？喺到生存，多一個人好過少一個人。」

「得嘅…如果你唔用枝矛戳我背脊。」

「我哋諗辦法離開宜座島吧。」

「造船？」我唯一想到可行的方法。

「嗯，帶我去你之前住咗成星期嘅沿岸，嗰到聽落好安全咁。」

為了離開這裡，我再次返回起點，在那邊開始跟陳子漢合力建造小木船。材料不外乎原木、樹根、樹枝。

他同伴遺下的食物，足夠我們趕工的這幾天使用。

「當初捉我哋嚟嘅人，真係會白白咁俾我哋走？」我一邊紮好樹根，一邊問。

「如果連逃生機會都無，人就會絕望，絕望係最慘酷嘅事情。」

經過數天的努力，木伐總算初步完成。

時不時就出現的無人機，對我們舉動虎視眈眈，十分密集地高空監察著。終於，來到出海的那一天，我們將木伐推出，一人負責撐船，另一人準備接力。

「哈哈，唔通真係咁易就走到？」陳子漢面向無盡頭的大海，爽朗一笑。

原本，我亦以為快要得自由，可是奇怪的事情發生了。

五分鐘前，我們離岸邊有十米左右距離，五十分鐘後，都依然只有十米距離，撐船就像浪費力氣一樣，完全沒有推進過。

「架船根本無郁過。」我定點觀察了許久。

「我開始有啲攰。」陳子漢放棄撐船，拍拍我臂：「換你。」

「你唔覺奇怪？」

「可能浪太大……」他說。

「試下游出去。」說畢，我就跳入水裡。

一跳入水中，就立即得知無法前進的真相，令我馬上捉住木伐，爬回上去。

「…下面水流好急，好唔正常，應該話，好唔自然。」我回望荒島，打個比喻：「就好似座荒島有股吸力，一直將自身範圍內嘅水流，都吸引過去。」

「係？」陳子漢將手伸入水中實測：「冇咩特別……」

「你試下成個人潛入下少少。」

他按照我的說話去辦，到他浮回水面時，已遠離木伐數米。

「真係有股吸力咁……大得好唔正常。」陳子漢說。

「我覺得，好明顯就係防止有人逃出去嘅裝置。」(續)